Friday 16 October 2009


ထောင်ဒဏ် ၅၉ နှစ် ချမှတ်ခံထားရစဉ် ကွယ်လွန်ခဲ့သူ သက်ဝင်းအောင် (အသက် ၃၅ နှစ်) (၁၉၇၁၊သြဂုတ်၂၆-၂၀၀၆၊အောက်တိုဘာ ၁၆)၂၀၀၆ခုနှစ် အောက်တိုဘာလ ၁၆ရက် မန္တလေးထောင်တွင် ကျဆုံးကွယ်လွန်ခဲ့သည်။



ကျောင်းသားစိတ်၊ခွပ်ဒေါင်းသွေးနဲ့အတူ ရှင်သန်သွားခဲ့သူ ရဲဘော်(သက်ဝင်းအောင်)အား ဦးညွတ်အလေးနီပြုခြင်း

ကျောင်းသားအခွင့်အရေးမှ စတင်
တိုင်းပြည်ကောင်းရေး စနစ်ပြောင်းတိုက်ပွဲ အားသွန်နွှဲစဉ်
နိူင်ငံရေးပုဒ်မဖြင့် အကျဉ်းထောင်စံမြန်း ထောင်ကျနေလဲ
သင့်ရဲ့ စိတ်ဓာတ် နှစ်ရှည်ထောင်မကျ
ထောင်တွင်းတိုက်ပွဲ အကြိမ်ကြိမ်နွှဲရင်း
နှိပ်စက်ခံရ အညှင်းပမ်းခံဒဏ်ကြောင့်
ခန္ဓာကိုယ်ချည့်နဲ့ ဝေဒနာသက်လည်း
တိုက်ပွဲခရီး မငြီးမငြူ တောင့်တင်းထူရင်း
ထောင်ဝင်စာအတွင်း တိုင်းရေးပြည်အကြောင်း
သတင်းပေါင်းအစုံ မေးမြန်းသည်ကအစုံ
ထောင်တွင်း အခက်အခဲ အဖုံဖုံကို
ဖွင့်ထုတ်ပြောရန် သင်ကမေ့လို့ထား
မ၀၊တ၀ အချိန်တိုအတွင်း
မိဘနှစ်ပါးနဲ့ မိတ်ဆွေအပေါင်းအား
စနစ်ကောင်းပေါ်ထွန်းဖို့အရေး အားတင်းထားကြရန်
သင့်ရဲ့ အမှာတမ်း ကျွန်ူပ်တို့ မမေ့နိူင်စွမ်းပြီမို့
အစဉ်သတိရ ဦးညွှတ်လျက်သာထာဝစဉ်။

ကျောင်းသားရဲ့ စိတ် ဖြူစင်လို့ဖွေး
ခွပ်ဒေါင်းရဲ့ စိတ် ရဲရင့်တည်ကြည်
ိထိုအဆင်းသဏ္ဍာန် သင့် တွင်ထင်ဟပ်
မွန်မြတ်လမ်းစဉ် သင်ကိုယ်တိုင်ကျင့်
အသက်ကို မငဲ့ သင်ပေးဆပ်ခဲ့ပြီမို့
အသင် ကျောင်းသားရဲဘော် ကောင်းရာသုဂတိသို့လားစေသော်ဝ်။

အေးမြဇင်(၁၆၊၁၀၊၂၀၀၉)

Saturday 3 October 2009

တတိယအကြိမ် ပတ္တနိက္ကုဇ္ဇန ကံဆောင်တိုက်ပွဲဝင်ခြင်းကို ၀ိုင်းဝန်းပံ့ပိုးကာ၊ ပူးပေါင်းပါဝင်ကြပါစို့။

မေတ္တာစွမ်းအင်တို့ဖြင့် ထုံမွှမ်းလျက်ရှိသည့် ဗုဒ္ဓ၏ ဓမ္မစက်ကို သွေးတို့ဖြင့်စွန်းထင်းပေကြံစေအောင် စစ်အာဏာရှင်စနစ်ဆိုးတခုက ပြုလုပ်နေလျက်ရှိခဲ့ပုံ၊ ရှိနေပုံကို ကျွန်ူပ်တို့အားလုံး မျက်ဝါးထင်ထင် တွေ့မြင်ခံစားနေကြရပြီး ဖြစ်ပေသည်။

ရင်တွင်းစိတ်အာရုံတွင် စစ်အာဏာရှင်စနစ်ဆိုး၊ စနစ်ယုတ် ကြောင့် သွေးမြေကြနေရမှုများ နှင့် တရားမှုဥပဒေများ လုံးဝစိတ်သုဉ်းကာ မတရားနှိပ်စက် အနိူင်ကျင့်ခံနေရမှုများကို ၀ိုင်းဝန်းတိုက်ထုတ်သွားကြမည်ဟု ရည်ရွယ်ချက် ပြင်းပြစွာဖြင့် ကျွန်ူပ်တို့အားလုံး လက်တွဲညီညာစွာလုပ်ဆောင်ကြကာ၊ သံဃာတော်အရှင်သူမြတ်တို့မှ စစ်အာဏာရှင်လူတစုနှင့် အာဏာရှင်စနစ်ကို အဓိကအထောက်အကူပြုနေသည့် လူများကို အရေးယူဆောင်ရွက်မည့် တတိယအကြိမ် ပတ္တနိက္ကုဇ္ဇန ကံဆောင်တိုက်ပွဲဝင်ရန် ထုတ်ပြန်ကြေငြာထားသည့် သီတင်းကျွတ်လပြည့်ကျော်(၁)ရက်နေ့ကို ကျွန်ူပ်တို့အနေဖြင့် အပြည့်အ၀အားပေးထောက်ခံကာ စစ်အာဏာရှင်စနစ်ဆိုးနှင့် အာဏာရှင်အနွယ်အပွါးတို့ကို လုံးဝပပျောက်ကင်းစင်သည်အထိ ပူးပေါင်းပါဝင်လုပ်ဆောင်သွားကြပါမည်ဟု သန္နိဌါန်ပြုလိုက်ပါသည်။

သာသနာ့အာဇာနည်အပေါင်းနှင့် ပြည်သူ့အာဇာနည်အပေါင်းအား နှလုံးသည်းပွတ်ထဲမှနေ၍ ဦးညွတ်အလေးပြုရင်း။

Friday 7 August 2009


၁၉၈၈ ပုံရိပ်




၂၀၀၇ ပုံရိပ်


ကမ္ဘာမကြေဘူး



၈၈၈၈ သွေး မခမ်းခြောက်သေး


မျိူးဆက်သစ်အားမာန် သွေးကြွေးဆပ်ရန်


ခွပ်ဒေါင်းအောင်လံ လွှင့်ထူချီဆဲ


ရဲသွေးနီစေ ကမ္ဘာမကြေ။



(အေးမြဇင်)(၇၊၀၈၊၂၀၀၉)

သွေးညီကြစို့



ကျောင်းသား၊ပြည်သူ လက်တွဲညီလို့

ဘုန်းကြီး၊စစ်သား ညီညွတ်အားဖြင့်

အာဏာရှင်အား တွန်းလှန်တိုက်ထုတ်

၈၈၈၈ ရဲ့ သွေး မခမ်းခြောက်သေးလျှင်

သမိုင်းကြွေးဆပ်ရန် တော်လှန်လမ်းစဉ်

မျိုးဆက်အသစ် ပခုံးဆက်လက်ကမ်း

ချီတက်လမ်းထွင် အောင်ပွဲမြင်ဖို့၊

ချီတက်လမ်းဆုံး အောင်လံလွှင့်ဖို့

စုစည်းညီစို့ ကိုယ့်လူအပေါင်းတို့။
စုစည်းညီကြ ပြည်ပအဖွဲ့အစည်းအပေါင်းတို့။
ကိုယ်ကျိုးဖယ်ရှား ပြည်ပအတိုက်အခံ (နာမ်မည်ခံ)များတို့။



အေးမြဇင်(၇၊၈၊၂၀၀၉)

Sunday 19 July 2009

တမ်းတပါသည်၊ မမေ့နိူင်သည့် အာဇာနည်


အလွမ်းမျက်ရည် တွေ တဖြိုင်ဖြိုင် သွန်ချ
အဖိုးမဖြတ်နိူင်တဲ့ အာဇာနည်တွေ ဇီဝိန်ကြွေကျ ၊
ထိုနေ့ အခါသမယ ရောက်လေတိုင်း
အဘယ်သို့လေ မေ့နိူင် စွမ်းပေဘူး ၊
အာဇာနည် ဗိုလ်အောင်ဆန်း နှင့် အဖွဲ့ ကို ရည်စူးကာဖြင့်
တို့မြန်မာ ပြည်သူ ပြည်သားတွေက
တောင်းဆုတွေ နဲ့ ကောင်းမှုတွေ ထုံမွှမ်းကာ၊
အာဇာနည်ဂုဏ်ပုဒ် တွေကို ရေရွတ်လို့သာ တမ်းတရင်း ။ ။

အာဇာနည်ခေါင်းဆောင်ကြီးတွေ ကောင်းရာသုဂတိ လားကြပါစေ

အေးမြဇင်(၁၈၊၀၇၊၂၀၀၇)

Tuesday 7 July 2009

၁၉၆၂ ခု ဇူလိုင်လ ၇ ရက်၊၈ ရက် အား တွေးမြင်ခံစားခြင်း

တက္ကသီလာ ပညာသင်ကြား
ငါတို့နောင်ဘွား ကျောင်းသူ၊ ကျောင်းသား
တက္ကသိုလ်အခွင့်အရေး(အိပ်ဆောင်အခွင့်အရေး) ပျောင်းပြင်ပေးရန်
ငြိမ်းချမ်းအသွင် ဖေါ်ဆောင်လှုပ်ရှား
တောင်းဆိုစုရုံး ညီညွတ်ကြပုံ
၁၉၆၂ ဇူလိုင်လ ပထမပါတ် လှုပ်ရှားမှု
ဖြစ်ပျက်အသွင်
တွေးကြည့်မြင်ကြည့် မြင်ကြည့်ကြစို့။

မိမိတို့အရေးတခုအတွက် မဟုတ်ပေမို့
တက္ကသိုလ်သမဂ္ဂ အားမာန်ထက်လျှံစွာဖြင့်
ကျောင်းသားတို့သွေး အသက်စတေးရန် ၀န်မလေး
စစ်အဏာရှင်စနစ်ဆိုးကို အမြစ် မပျိုးမိလေအောင်
မီးမောင်းထိုးညွှန်ပြ ဦးဆောင်ကာ တောင်းဆိုတိုက်ပွဲ
ရန်ကုန်တက္ကသိုလ်သမဂ္ဂ အဆောက်ဦးထဲ
တက္ကသိုလ်ကျောင်းဝင်းထဲမှ လှုပ်ရှားခဲ့ပုံ
၁၉၆၂ ဇူလိုင် ပထမပါတ်
ဖြစ်ပျက်အသွင်
တွေးကြည့်မြင်ကြည့် မြင်ကြည့်ကြစို့။

ကျောင်းခန်းအထက် သင်ပုန်းနက်လဲ သွေးတွေပေကျံထင်ကျန်ရစ်လျက်
ကျောင်းနံရံထက် အင်္ဂထေပြင် သေနတ်ကျည်ရာ ထင်ကျန်ရစ်ပြီး
တက္ကသိုလ် ကျောင်းဝင်းတခွင် ယမ်းနံ့ မွှန်စွဲ
စင်္ကြံလမ်းထက် လဲကျခန္ဓာ သွေးပွက်အိုင်ထွန်း
ကံ့ကော်တန်းလမ်း သွေးကွက်လွှမ်းခဲ့
၁၉၆၂ ဇူလိုင် ၇ ရက်
ဖြစ်ပျက်အသွင်
တွေးကြည့်မြင်ကြည့် ခံစားကြည့်စို့။

ဗြိတိသျှ၏ တက္ကသိုလ်အက်ဥပဒေကို
အမျိုးသားရေးတရပ် တာဝန်ဖြင့်ဖီဆန်
ကိုလိုနီတိုက်ပွဲ၊ နယ်ချဲ့ ဖက်ဆစ်ရန် တွန်းလှန်တိုက်ပွဲ တွေထဲစီးဝင်
ကျောင်းသားထု ညီညွတ်ရေး ပင်မရေစီးချောင်း မြစ်မကြီးတဖြစ်လဲ
တက္ကသိုလ်သမဂ္ဂ အဆောက်အအုံကြီးကို ဖေါက်ခွဲဖျက်ဆီးခံရတဲ့နေ့
၁၉၆၂ ဇူလိုင် ၈ရက် နံနက်ဦးပိုင်းချိန်
ဖြစ်ပျက်အသွင်
တွေးကြည့်မြင်ကြည့် ခံစားကြည့်စို့။

အေးမြဇင်(၇၊၇၊၂၀၀၉)

Tuesday 16 June 2009

မြင့်မြတ်ဆန္ဒ ထုတ်ဖေါ်ပြကြ



အောင်ဆန်းသမီး
ရောင်ရမ်းပြီး ဒီမိုကရေစီတိုက်ပွဲခရီးထဲ ရောက်လာတာမဟုတ်

အောင်းဆန်းသွေးတစက်မလျော့
အာဏာရှင်ကိုရင်ဆိုင် တော်လှန်
တိုက်ပွဲတိုင်း တချက်မပျော့စွာဖြင့် ဦးဆောင်ပြ

အာဇာနည်အမျိုးသမီးကောင်း
ဒေါ်အောင်ဆန်းစုကြည်
ရာဇ၀င်ထဲတွင်မည့် မြင့်မြတ်သော လုပ်ရပ်တွေပေါင်းစုအစုံ လုပ်ဆောင်လျက်

ဒေါ်အောင်ဆန်းစုကြည်
တိုင်းမြန်ပြည်အကျိုးပြုလုပ်ငန်း
လွတ်လပ်စွာ လုပ်ဆောင်နိူင်စွမ်းရစေဟု ဆန္ဒတွေပြုကြစို့။



AMZ(16.05.2009)

Monday 25 May 2009


မြန်မာနိူင်ငံ မျိုးဆက်သစ်အတွက် သစ္စာဓိဌါန်



တိုင်းပြည်ကိုမပစ် ပြည်သူ၊ပြည်သားကိုချစ်


ပြည်ရွာလွတ်လမ်း အစွမ်းရှိသမျှထမ်း


စွမ်းဆောင်လို့လှမ်း ကြိုးပမ်းလုပ်မည်


ခက်ခဲကြမ်းပစေ လုပ်ဆောင်မည်(မလေ)ဟု


သန္နိဌါန်ပြု ပြုပါလေ၏ ပြုပါ၏။



နွံနစ်ပြည်သူ ဆွဲကူထူမ


ပြုသည့်အကြံ သစ္စာမှန်က


နှောက်ယှက်ရန်မူ ယုတ်မာသူတို့


တူသည့်အကျိုးကံ ကြည့်မှန်အလား


ရောင်ပြန်သွားစေ တွေ့ရပါစေ


သစ္စာကိုပြု ပြုပါလေ၏ ပြုပါ၏။



နွံနစ်ပြည်သူ ဆွဲကူ၊ထူမ


ပြုသည့်အကြံ သစ္စာမှန်က


မသွေဖီလှမ်း လျှောက်လှမ်းနိူင်ရ


ပြည်သူလွတ်လမ်း ပန်းတိုင် လမ်းတိုင်


ရောက်ရှိရစေ ရောက်ရမည်(မလေ)ဟု


သစ္စာကိုပြု ပြုပါလေ၏ ပြုပါ၏။ ။



အေးမြဇင်(၂၄၊၀၅၊၂၀၀၉)





Monday 18 May 2009

အောင်ပွဲထိတိုင်အောင်


ရယ်ပြုံးပြရတဲ့ နှုတ်ခမ်းတွေ


ထူအမ်းလို့သာ ကွဲအပ်လာ


တုန့်ပြန်မှုက နတ္ထိဗလာ



လက်ခြင်းယှက်ကာ ဆွဲလက်လှုပ်ရမ်း


မညောင်းညာစတမ်း ဆုပ်ကိုင်


လက်ဖဝါး၊လက်ဖျံတွေသာ ပြုတ်ပြတ်မတတ်


တုန့်ပြန်လက်တွေက အားအင်မဲ့စွာ



ရင်ခြင်းအပ်ကာ ချဉ်ခြင်းတက်စွာပွေ့ဖက်


မနာကျင်စတမ်း ထိကပ်ထား


ရင်ဘတ်တပြင်လုံး နီမြန်းကာသာပွန်းပဲ့


တုန့်ပြန်ချက်တွေက ဆန့်ကျင်ဘက်ဖီလာ



သစ္စာအားတွေလဲ ထုထည်မမျှ ပြုပါရဲ့


မေတ္တာပွါးကာလဲ အဆမတန် ပြုပါရဲ့


ကိုယ်စိတ်နှလုံး ကြည်လင်အောင် အမြဲထာဝရ အသုံးပြုပါရဲ့



သို့ထက်ထိတိုင် ....


ကိုယ့်ဘက်က မစောင်းမယိုင်



တပါးသူက ချေဖျက်သည့်တိုင်


အောင်ပွဲဆီသို့ ဆက်လှမ်းမည် မယိမ်းမယိုင်။ ။



အေးမြဇင်(၉၊၀၅၊၂၀၀၉)



Saturday 18 April 2009


ငြိမ်းချမ်းမှုများကိုငံ့လင့်ရင်း၊

နှစ်သစ်ဦးအခါသမယနှင့်ထပ်တူ

မေတ္တာပန်းများကို ရင်ဝယ်ပိုက်နိူင်ကြစေကုန်သော်ဝ်။

Sunday 12 April 2009


သစ္စာမခမ်း ပိတောက်ပန်းတို့ စေညွှန်ရာ

နှစ်ဦးကြိုစ တန်ခူးလတွင်
မဟာပိတောက် သစ္စာထောက်ထား ပွင့်လို့သာမြဲ
မွှေးပျံ့ ရနံ့ ၀န်းကျင်ဆန့်လျက် ပွင့်ထူးတင့်စဲ
ရွှေဝါရောင်ဝင်း တောက်ပလင်းခြုံ မြင်ရပုံထူး
စိတ်ကြည်နူးသွား သူ(ပိတောက်)ပြုစား၏။

သစ္စာမပျက်သော ပိတောက် ဖူးပွင့်ဝေချိန်
ကြည်လင်စိတ်များ စတိုးပွားလာ
လှုပ်ရှားစိတ်များ တည်ငြိမ်သွားကာ
ပွင့်လန်းစိတ်ထား သစ္စာပျက်မသွားဖို့
လှုံ့ဆော်သတိပွါး သူ(ပိတောက်)စေထားသလား။

ပွင့်လန်းစိတ်ထား သစ္စာမြဲကြဖို့
လှုံ့ဆော်သတိပွါး သူ(ပိတောက်)စေထားသလား။

အေးမြဇင်(၁၂၊၀၄၊၂၀၀၉)

Sunday 5 April 2009

မွေးနေ့အသက်

လောကအလယ် ၀ံ့ဝါထည်အောင်
သဏ္ဍာန်လှုပ်ရှား ကြိမ်ခါတိုင်းစဉ်၊
တွေးတောရွေ့မျော နာမ်စိတ်စောစဉ်၊
ပညာသတိ ဥာဏ်ကြည်လင်းဆောင်
သတိဥာဏ်ဦး ပြုမူထူးတို့
ခွဲခြမ်းစိတ်ဖြာ မှတ်လို့သာမြဲ
ကျင့်ကြံဓလေ့ ပျော်မွေ့လေမှ
ရှင်သန်အသက် အဓိပ္ပါယ်ရှိလျက်
တရက်နေခိုက် အကျိုးဆိုက်ခါ
မွေးနေ့တရက် အကျိုးမြတ်လှ
လူ့ဘ၀တွင် ဂုဏ်ရောင်လွင်တောက် စိုတောက်ပေ့စေ။
လူ့ဘ၀တွင် ဂုဏ်ရောင်လွင်တောက် စိုတောက်ပေအံ့။ ။

AMZ
(၅၊၀၄၊၂၀၀၉)


ညီမလေးမွေးနေ့ အမှတ်တရအဖြစ် မွေးနေ့လက်ဆောင်။


Friday 13 March 2009

စုစည်းအားဖြင့် တိုက်ပွဲဝင်


လာခဲ့ရာလမ်း ပြန်လို့သာ တွေးဆင်ခြင်
ငါတို့ဟာ ဒဏ်ရာဗလဗွတွေနှင့် ထုံမွန်း
လူ့ဘီလူးတွေရဲ့ အကြမ်းဖက်အုပ်စိုးမှုအောက်မှာလေ၊
သွေးစွန်းကာ အသက်တွေပျောက်ကြရ
မိသားစု အသိုက်အမြုံတွေ ပြိုလို့ပျက်ကြရ
ပညာရေး မျှော်လင့်ချက်လမ်းစတွေ ပျောက်ဆုံးကြရ
အတုံးအရုံးနဲ့ ဆုံးရှုံးမှုတွေအောက်မှာလေ။


စဉ်းလဲသူတို့ရဲ့ အုပ်စိုးအနိူင်ကျင့်မှုတွေတလျောက်
ဝပ်ပြားလို့ မနေချင်ကြသူများရယ်မို့
ဇွတ်တိုးလို့ကာ အကြောက်တရားဖယ်ရှား
ဖေါက်ပြားသူ အ၀န်းအ၀ိုင်းကို တော်လှန်ခဲ့ ရာဇ၀င်တွင်
ဖေါက်ပြားသူ အ၀န်းအ၀ိုင်းကို တော်လှန်ခဲ့ ထာဝစဉ်။


အဖိအနှိပ်ခံ ခါးစည်းဒဏ်ပိနေ ပြည်သူအပေါင်းအတွက်
ကောင်းချီးမင်္ဂလာအချိန်ကို ရောက်ဖို့ရန်လေ၊
လွတ်လပ်ဖို့အတွက် လွတ်မြောက်ဖို့ကို ကြံဆ
ထိုထိုစိတ်ကူး ဆန္ဒများကို ဖော်ဆောင်
ပြည်သူအပေါင်းရဲ့ ဆင်းရဲမှု ဒုက္ခပေါင်းများစွာနှင့်
ထပ်တူကာ ငါတို့ခံစားရင်း
ဒေါင်းအနွယ်တို့ရဲ့ လာရာလမ်းကို
မေ့လျော့ကာ မသွားမိစေဖို့ ထားကြအစဉ်။


ဒေါင်းအနွယ်တို့ရဲ့ ခွန်အားအပေါင်းဖြင့်
အမှန်အစစ် အင်အားစုစည်းလို့ကာ
အကြံအသစ် အစဉ်အတွေးများ ပေါင်းစုအားဖြင့်
မတရားပြုကျင့်သူအပေါင်းကို မောင်းထုတ်ရန်
ဝိုင်းဝန်းကာ မနှေးအမြန် တိုက်ထုတ်ကြ(ပါစို့)။ ။


အေးမြဇင်(၃၊၂၀၀၁)

Saturday 10 January 2009

ပြာသိုလပြည့် အမေများနေ့အား ဂုဏ်ပြုခြင်းအနေဖြင့် အမေ့အတွက်ရေးဖွဲ့ ခဲ့သည့်ကဗျာအား ပြန်လည်ဖေါ်ပြရင်း ........
အဝေးတနေရာရောက်ရှိနေသော သူတယောက်အနေဖြင့် အမေ့ကျေးဇူးအပေါင်းအား မရေမတွက်နိူင်ခြင်းမြောက်များစွာဖြင့် .....
တပါးသူအပေါ်နှင့် အများသူငှါတို့အပေါ်ကိုယ်ချင်းစိတ်ဓါတ်များကို ထားရှိစေနိူင်ရန် သွန်သင်ဆုံးမပေးလျက်ရှိသော အမေအပေါင်းအား ဂါရ၀တရား ရင်တွင်းပွါးလျက် ...........


ဂုဏ်ပြုအပ်စေ အမေ့မေတ္တာတွေ


အမေ…

ကိုယ်လေးလက်ဝင်ရှိစ

ရင်သွေးရယ်လို့ ရုပ်လုံးပင်

ဝမ်းကြာတိုက်တွင် ဘယ်အရာမထင်သေး

အထိုကာလကအစပြု ကိုးလချိန်တာလွန်သည့်တိုင်

အနေ အစားကို ဂရုပြုလို့ရယ်ရှောင်

အချိန်တိုင်းဟာဖြင့် ရင်သွေးအတွက်အသက်ရှင်

အတိုင်းအထက်အလွန်

မေတ္တာနက်ရှိုင်းလှပါဘိ အေ မ ။ ။


အမေ…

ဝမ်းလွယ်လွန် ရွှေကြာဗိုက်မှသွန်

ရင်သွေးငယ် နီတာရဲစွတ်စိုအား

ဘယ်မလဲကွယ် ညင်သာစွာထိစမ်းလို့ရယ်

လှိုက်လှဲစွာ လူ့လောကထဲသို့ ကြို

ရင်ခွင်ကြားဝယ် ပိုက်ထွေးကာဖြင့်၊

မီးနေသည် သုဿန်မျက်စောင်းထိုး

အထိုစကားချိုးကို ကျော်ဖြတ်ခါဖြင့်၊

ရှုံ့နမ်းကာ အကြိမ်မရေတွက်နိုင်ဘု

အတိုင်းအထက်အလွန်

မေတ္တာနက်ရှိုင်းလှပါဘိ အေ မ။ ။


အမေ….

ပခုံးရယ် လက်နှစ်သစ်

လူ့လောကအလယ် လှမ်းဝင်စ

ငိုသံနှောကာ တစာစာဂျီကျလို့ရယ်

နို့ချိုလွေးဖို့ တောင်းဆိုသူအား

အရှက်တရား မေ့ပြစ်ထားလျက်

ရင်သားမြတ်အား ဖွင့်လှပ်ထားစေ

အားအင်ဖြစ်ကြောင်း နို့ရည်တိုက်ကျွေး

ရွှင်လန်းစေ မေ့ရင်သွေးငယ်လေးကိုဖြင့်

အတိုင်းအထက်အလွန်

မေတ္တာနက်ရှိုင်းလှပါဘိ အေ မ ။ ။


အမေ…..

စကားရယ် ဖေါင်ဖွဲ့ကာပြောဆို

လူသားအလယ် ရပ်တည်ဆံ့ချိန်

လောကပါလ တရားတွေသွန်သင်

နှုတ် မကြမ်းတမ်းစေ၊

စိတ်ယုတ်မာ မထားရှိစေ၊

ကိုယ်ချင်းရယ်စာ ဂရုဏာဓါတ်ရှိစေ၊

အချိန်ရယ်မလပ် သင်လို့ကာမြွတ်တြား

ထားအပ်စေကြောင်း မြင့်မြတ်စိတ်များဖြင့်

အတိုင်းအထက်အလွန်

မေတ္တာနက်ရှိုင်းလှပါဘိ အေ မ။ ။

အမေ…

အမေ့အသွင်

ဇရာတွေထင်း

ဆံကေသာ ငွေအဆင်းရောင်၊

ပါးရေတွေ လှိုင်းကြက်ခွပ်သဏ္ဌာန်၊

အရေပြားလွှာ ရေစီးညင်သာဟန်၊

စကားပြောသံ တိုးရှလေးခွင်းဖြတ်သည့်ကဲ့၊

ရုပ်သဏ္ဌာန်ဟန် ပြောင်းလဲလာလည်း

အမေ့ နာမ်စိတ်အစဉ်

ယခင်အတိုင်း မပြောင်းမထိုင်း

ရင်ဖြစ်ပေါက်ဖွါး ရင်သွေးသားတွေအား

ဆုံးမ မပျက် သွန်သင်လျက်ပင်

ရှိအပ်စေကြောင်း ရင့်ကျက်စိတ်ထားကောင်းဖြင့်

အတိုင်းအထက်အလွန်

မေတ္တာနက်ရှိုင်းလှပါဘိ အေ မ။ ။


အမေ…

နက်ရှိုင်းလှပါဘိ

အမေ့၏ မေတ္တာစွမ်းအင်အား

သားသမီးတွေဆီ ဆက်၍ဆက်၍တိုးပွါး

အဖိုးအနဂ္ဂရယ် နှိုင်းယှဉ်ကာ မဆိုကြွားဝံ့

အမေ့ သားသမီးတွေ ထားရှိစိတ်ဘ၀င်ဖြင့်

ဦးထိပ်မည် လက်အုပ်မိုး ရွှေကြာဖူးငုံသဏ္ဌာန်

ဆည်းကပ်ကာ ဦးတော် ညွှတ်တွားလို့ရယ်

အမေ့ စရိုက်သဏ္ဌာန်၊ စိတ်ဝိဥာဉ်အစီအမံ

သား၊သမီးတို့ လက်ဆင့်ကမ်းသယ်ကာဖြင့်

အမေ့မေတ္တာကျေးဇူးတွေအား ဂုဏ်ပြုပူဇော်အပ်ပါ၏ အေ မ။ ။ ။

အေးမြဇင်(၇၊၁၂၊၂၀၀၇)

မွေးမိခင် အမေ ဒေါ်ခင်အေးရီ အား ဤကဗျာလေးဖြင့်ပူဇော်အပ်ရင်း၊ ဖွားမေ လူထုဒေါ်အမာ နှင့် ဒေါ်မေ ဒေါ်အောင်ဆန်းစုကြည် တို့ကဲ့သို့ စူးရှရဲရင့်သောမေတ္တာတို့ဖြင့် ပေးဝေမျှလျက်ရှိသည့် မိခင်အပေါင်းအား ရည်စူးဂုဏ်ပြုလိုက်ပါ၏။